بدون عمليات أو "دايت".. سيدات يروين لـ"مصراوي" كيف خسرن 50 كيلو

شيماء صلاح 40 سنة (من 135 إلى 70 كيلو)

"بنتي قالتلي في مرة إنتي مش هتبقي معانا في الخروجات لأنك مش بتتحركي، وأنا فعلا كنت بشيل الشنط ليهم وخلاص، قررت وقتها إني مش عاوزة أستمر على نفس الوزن ده أبدًا، وطلعت صوري وانا صغيرة، وقلت إني هرجع للجسم ده تاني".

"أنا محبتش أروح لدكتور، علشان التجارب اللي حواليا مشجعتنيش، لاقيت إن الموضوع اتقلب ورقة مطبوعة بنفس الدايت تقريبًا رغم اختلاف السن بينهم، والحالات الصحية".

"قابلت إحباط في البداية كتير، خصوصًا إن عندي الغضروف وخشونة في الركبة، والأطباء منعوني من الحركة، لكن اتواصلت مع اختصاصي تأهيل إصابات وساعدني على التدريب، قويت عضلات الركبة وبقيت أحسن صحيًا أحسن جدا وبقدر اتحرك الحمد لله وبلعب حديد".

"مش بعمل دايت، أنا غيرت استايل حياتي كله، وباكل أكل صحي ومن غير ما احرم جسمي من أي عنصر محتاجة، وبعتمد على سكر الفاكهة وعسل النحل، وكمان زيت الزيتون وجوز الهند، والسمن الطبيعي الفلاحي، وبعد تمامًا على الزيوت المهدرجة".

"الموضوع اتعكس على صحتنا كلنا، أمي مريضة سكر، لما اتبعت النظام بتاعي، واتحسنت صحتها جدا، وبنتي كمان صحتها حاليًا أفضل رغم إن جسمها قابل للزيادة".