بدون عمليات أو "دايت".. سيدات يروين لـ"مصراوي" كيف خسرن 50 كيلو

سارة 29 سنة (من 96 إلى 60 كيلو)

"أنا بعمل دايت تقريبا من إعدادي بسبب التنمر اللي كنت بتعرض له كتير من أطفال في سني، لكن كنت بخس وبرجع تاني".

"كان كل مرة في سبب للدايت، إما عشان أعجب حد، أو عشان يقبلوني في الشغل، دايما كنت بترفض عشان شكلى وحش أو حجمي كبير أو قصيرة ومكببه ومش باينه من الأرض".

"بسبب مشاكل في الغدة والهرمونات، طلعت من ثانوي عام 124 كيلو، وأول ما دخلت الجامعة، اضايقت ونزلت وزني لحد 84 كيلو، لكني تخنت تاني من أكل الكلية".

"أول عريس صالونات قابلته، رفضني بسبب وزني، مع أنه مبصش في وشي، وده بالرغم من أنه أصلا كان تخين جدا بدرجة كبيرة وملفتة".

"مع الوقت رميت فكرة خسارة الوزن من دماغي، لكن لحد 2018، تعبت جدا المرارة كانت ملتهبة وحصلي ارتجاع في المريء، وكان لازم أمشي بالعلاج، وده شيء أنا رفضاه".

"الدكتور منعني من الأكل عشان الارتجاع، فقررت إني أغير أسلوب أكلي وأنه يكون صحي أكتر عشان متعبش زيادة أو أدخل عمليات".

"في الأول كنت لسة سايبة الشغل ومش معايا فلوس اشتري أكل مخصوص للدايت، فقررت إني هقلل الأكل وطريقة الطبخ".

"أنا وزني نزل من 96 ونسبة الدهون 65% وحاليا أنا 60 كيلو ونسبة الدهون 20%، ولو حسيت إني مش بقدر أتحكم في الأكل كنت باكل كميات بسيطة جدا".